أحمد سعد يروي قصة بداياته في عمل جديد: هاخد الناس وأطير
روج الفنان أحمد سعد لألبومه الجديد الذي يحمل اسم «حبيبنا»، والمُقرر إطلاقه يوم 15 يناير الجاري.
وشارك أحمد سعد جمهوره ومتابعيه قصة بداياته وحلمه، عبر مقطع فيديو ترويجًا للألبوم الجديد.
ألبوم أحمد سعد الجديد
قال في الفيديو الذي نشره عبر حسابه الرسمي بموقع انستجرام: «حاجة جميل أوي إن يكون عندك حلم والأجمل من كده أنك تحققه، طول عمري أحلامي ملهاش سقف وأنا صغير كنت بحب المزيكا أوي».
وتابع أحمد سعد: «كنت بشوف كل حاجة ألحان، حتى الكلام كنت بشوفه لحن، كانوا أخواتي بيستغربوا جدًا وأنا صغير، إزاي طفل يحفظ الحاجات التقيلة دي وكنت بسمع مشايخ وأم كلثوم وعبدالوهاب، وكنت بسأل نفسي هتغني إيه فيهم، كنت بسمع كل أنواع الموسيقى عشان ألاقي لنفسي شكل الناس تحبني بيه».
بدايات أحمد سعد
واستكمل: «اتصدمت أول صدمة، عرفت إن الطريق مش سهل، أنا محتاج الناس تحبني، وفضلت أسعى وأسعى وأعمل أشكال جديدة في المزيكا بحبها، بس مكنتش كل الناس بتحبها، قعدت 15 سنة بجرّب بعمل اللي بحبه واللي الناس بتحبه وأشوف زمايلي بتعمل إيه عشان أعرف ذوق الناس واحترت بصراحة، مكنتش عارف أعمل إيه، وصلت إن أعمل اللي الناس بتحبه بالطريقة اللي بحبّها، وحصل النجاح مجاش من يوم وليلة».
وأضاف أحمد سعد: «ناس بقت تحبني وناس بقت تحب أغانيّ، وبقيت ببقى طاير في السما وأنا واقف على المسرح.. لأ طاير بجد، والناس بتغني ورايا وبتقول إيه اليوم الحلو ده، ووسّع وسّع بس عرفت إن المسئولية ابتدت وأنا محتاج زي ما أنا بعمل اللي ناس بتحبه، كمان أعمل اللي أنا بحبه».
واختتم: «وأنا مصدق إن اللي بتحبه من قلبك الناس أكيد هتحبّه معاك، وهي دي تجربتي المرة دي هاخد الناس وأطير في السما، باللي أنا بحبّه، الأيام الجاية هتعرفوا إيه هي التجربة»، معلقًا: «حبيبنا.. يوم 15 يناير 2025».
View this post on Instagram
