اخبار الفن أيتن عامر ترد على الانتقادات: ليه بتهاجمونا أننا بنعلن عن شغلنا
أعربت الفنانة أيتن عامر عن استيائها من انتقاد الجمهور للفنانين بسبب العودة لأعمالهم، تزامنًا مع حرب غزة.
قالت أيتن عامر في فيديو نشرته عبر حسابها الرسمي بموقع انستجرام: «أنا بقالي شهر ونص من أول ما الكارثة دي حصلت وأنا مبعلنش غير عن الكوارث اللي بتحصل هناك».
أيتن عامر عن حرب غزة
وتابعت: «الأكونت بتاعي كان هيتقفل بسبب الحاجات اللي بنشرها طول الوقت فـ زي ما إحنا مؤمنين بالقضية وبندعمها بكل ما أوتينا من قوة بيصعب عليا أوي لما بلاقي حد من زملائي بيعلن عن شغله والناس بتهاجمه».
واستكملت الفنانة أيتن عامر قائلة: «وتقوله أنت مش حاسس بالناس ومعندكش دم.. كلنا متأثرين بس ردود الأفعال غريبة شوية ده شغلنا ودي طبيعة شغلنا والإعلان عن شغلنا من ضمن العقد».
أيتن عامر
تصريحات أيتن عامر
وقالت أيضًا: «ليه بتهاجمونا أننا بنعلن عن شغلنا أو أننا أصلا بنمارس شغلنا ده مش سبب منطقي أبدًا إحنا ممكن نهاجم حد متكلمش عن القضية أصلاً ولو إني شايفة أن دي حرية شخصية بردو ومش معنى أننا بنعلن عن شغلنا أننا بنشغل الرأي العام عن القضية».
وأضافت أيتن عامر: «لأن نفس الأكونت اللي بيعلن عن شغله هو نفس الأكونت اللي بينشر الكوارث اللي بتحصل في فلسطين.. ليه واخدين موقف أوي كدة من الفنانين وبيصعب عليا أوي فارجوكم استوعبوا إن الإعلان عن شغلنا ده جزء من شغلنا إحنا ملزمين بيه وجزء من عقدنا وإحنا أكيد مش عايزين شغلنا يتأثر».
واختتمت: «لأن محدش بينفع حد ولا حد بيحس بحد فـ كفاية هجوم لأن زي ما انتو بتعملوا شغلكم إحنا كمان بنعمل شغلنا ومحدش يزايد على حد محدش عارف إحنا بنمر بإيه».
وعلقت أيتن عامر على الفيديو قائلة: «بلاش نزايد على بعض من فضلكوا، أنا بقالي شهر ونص مبنزلش حاجة على الاكونت غير لدعم القضية.. و عندي فيلم في السينما نزلتله بوست لقيت هجوم مش طبيعي، من فضلكوا افهموا إن ده شغلنا زى ما كلكوا بتمارسوا شغلكوا عادي وبلاش نزايد على بعض من فضلكوا».
أيتن عامر
View this post on Instagram
