المخرج عمرو سلامة: جملة «السعادة على بعد عشر دقائق» شجعتني على طلاق زوجتي
كشف المخرج عمرو سلامة، العديد من الجوانب الشخصية بحياته، مثل كواليس طلاقه الأول، وكيف هي علاقته بزوجته الحالية.
عمرو سلامة تكشف كواليس طلاقه الأول
قال المخرج عمرو سلامة في تصريحات تليفزيونية: «لما حصل طلاق أول مرة كانت علاقتي بزوجتي السابقة جيدة جدًا، عمرنا ما اتخانقنا بس لما قعدنا نتكلم وسألتها لو قابلتيني لأول مرة بشخصيتي النهاردة زي ما اتقابلنا من سبع سنين، تقبلي تتجوزيني؟ قالتلي لأ، ففهمت إني مبقتش مناسب لمتطلباتها».
وتابع: «لسه في مشاعر تجاه بعض أه بس خلاص مش هينفع، ولو حد كسر العقد اللي كان بينا يبقى أنا، لأني اتغيرت بشكل كبير عن الشخص اللي كنت عليه قبل الزواج».
وأردف عمرو سلامة حديثها وقال: «من الجمل اللي شجعتني على خطوة الطلاق، جملة بتقول السعادة هي على بعد عشر دقايق من مواجهة دمها تقيل، يعني تدخل في مواجهة هتقول فيها كلام من قلبك في عشر دقايق بأكتر شكل ملائم، وممكن ده يوصلك للسعادة ولحل المشاكل دي، ساعات بفتكر إن العشر دقايق دول هيفتحولك عش الدبابير بس الحقيقة إنه ممكن يصلح كل حاجة».
عمرو سلامة
تصريحات عمرو سلامة
واستكمل عمرو سلامة حديثه قائلًا: «الفرق بين جوازي الأولاني والتاني إني في الأول كنت مش بتخانق وفي نفس الوقت مش بقول على الحاجات اللي بتضايقني، لكن في جوازي دلوقتي مش بتخانق برضه بس أي حاجة بتحسسني إنها ممكن تسبب مشكلة لازم أتكلم فيها من البداية مع شريكتي».
وأضاف عمرو سلامة: «كنت بحس إني لو مش في علاقة يبقى أنا لا شيء، وكنت بقول على البيت الفاضي إنه قبر، وقعدت عشرين سنة في حياتي، عمرها ما حصلت فيهم إني قعدت شهر سينجل، كنت بدخل من علاقة لعلاقة، كنت بخاف أبقى لوحدي وبحس إني لو مش في علاقة يبقى أنا لا شيء، وكنت بقول على البيت الفاضي إنه قبر، كنت بركن العربية وأقعد فيها ساعة أسمع أغاني عشان مش قادر أدخل البيت وملاقيش حد جوة».
عيوب عمرو سلامة
كما كشف عمرو سلامة عيوبه، وقائلا: «فيا عيب إني شخص مش بيتخانق خالص مش بتاع خناقات، حتى في الشغل أنا مش شخص عنيف ومش بصعد الأمور، بس بيكون في توقيت سنوي بفقد في أعصابي وبندم بعدها سنة لحد ما أنسى، ومعظم الوقت اللحظة دي بتكون في الشغل، بيطلع مني وحش كاسر».
واختتم عمرو سلامة حديثه: «شايف إن كدة كدة محدش بياخد معاه حاجة وهو رايح القبر، وعايز الناس تفتكرني بإني مكنتش مؤذي، ياريت يفتكروا إني أعطيت كتير بس على الأقل مبقاش مؤذي، والفكرة مش في أنت هتاخد إيه معاك وأنت بتموت الفكرة في هتبقى باصص لنفسك إزاي وأنت بتموت».
