انتصار: والدي صعيدي وأنا متمردة.. «الحياة كفاح مش جاية ع المرتاح» عنوان قصتي

أثارت الفنانة انتصار ضجة واسعة وجدلًا كبيرًا بسبب تصريحاتها الأخيرة، حول إمكانية وقوعها في الحب مجددًا وأزمتها مع نيللي كريم ومحمد رمضان، كما كشفت أسرار من حياتها الشخصية وطفولتها.

قالت انتصار في تصريحات تلفزيونية لها: «ياما كنا مطلوبين وزهقنا بقى، اكتفينا، أنا عمري ما أخاف سواء مرغوبة أو مش مرغوبة من الرجال»، موضحة أنها من الممكن أن تتخذ المبادرة للاعتراف لشخص بإعجابها.

تصريحات انتصار

وتابعت: «في كهربا كدة يا جماعة، مش معقولة إحنا عديمين الإحساس، ساعات بتحسي بالكهربا، هي ربانية من عند ربنا وصادقة، وموجودة في الطاقة العادية في طاقة المكان بتوصلك، والعيون تتلاقى في وسط الزحمة والقلب بيدق والكل بيسكت».

واستكملت الفنانة انتصار قائلة: «وهنا حدثت الشرارة الأولى، وبتكمل اللحظة دي اكتمال حلو، مش لازم العلاقة تكمل وتتجوزوا، لكن المؤكد هيحصل حاجة حلوة، الأرواح تلاقت.. الحب جميل وشرارة الحب فيها جرأة ومغامرة والدورة الدموية تشتغل والأكل بيبقى له معنى والنوم والصحيان له معنى ودولاب الملابس له معنى بعد أي حادثة حب».

انتصار

أسرة انتصار

وقالت عن أسرتها وطفولتها: «والدي حافظ للقرآن وزاهد في الحياة وصعيدى وأنا متمردة دائمًا، ولكن الصعايدة لديهم تفتح عقلي ونفسي غير عادي، والجدة في الصعيد بتحكم على رجالة، ولو الراجل مضايق الست يطلع عينه، والست غالية جدًا هناك ولها قيمة والصعايدة بيحترموا الست ولها وزن، وبيسمعوا رأى الست، واللي فرحانين بيا أهلي اللي في الصعيد».

وفيما يخص موقف أسرة انتصار من دخولها عالم الفن، علقت قائلة: «والدي كان متخوف في البداية من عملي كممثلة، ولما بدأ يشوف أخباري في الصحف فرح، وأمي كانت داعمة ليّ ودعمها واضح عكس والدي، موقفه ودعمه مكنش واضح وسابني اتحمل اختياري».

انتصار ونجوم الفن

وقالت عن أزمتها مع محمد رمضان: «هو رد عليا رد حقيقي وأنا لم أقصد الإساءة إليه في عز نجوميته»، وردت على تصريحات المخرجة كاملة أبو ذكري بشأنها، قائلة: «أتمني إن المخرجة كاملة أبو ذكري متتكلمش كتير في البرامج لأنه مش صح، مينفعش كل شوية تطلع على الناس لأني مبحتش إنها عملت كدا، وبراحتها متشتغلش معايا تاني».

وأضافت انتصار في ردها على كاملة أبو ذكري: «إنتي مخرجة كبيرة ليكي اسم مينفعش البرامج تستغلك، وتطلعي تتكلمي عن زملائك وحش، لأنك من أهم المخرجين الموجودين في الشرق الأوسط، وأنا بحبها جدًا لأنها صاحبتي».

وقالت عن تعليمها التمثيل لنيللي كريم بحسب تصريحات سابقة لباسم سمرة: «مكنش يقصد هو كان قصده إنه في الفترة دي كنا بنمثل بقالنا فترة طويلة، وهي وقتها كانت راقصة شاطرة، كانت بتلعب بالية حلو، وعجبني ساعتها إن نيللي كريم مردتش خالص واحترمتها جدًا».

تصريحات انتصار

أسرار انتصار

وأشارت انتصار إلى أنها تستعين بـ 13 محاميًا بسبب كثرة القضايا، التي رُفعت ضدها بشأن بعض تصريحاتها، مضيفة: «أنا بقول اللي أنا عاوزاه ومش هسمح لحد يفقدني هويتي واللي عاوز يكتب حاجة يكتبها وأنا هقول اللي عاوزاه مش هتغير».

وقالت أيضًا: «الحياة كفاح مش جاية ع المرتاح دا عنوان قصتي، ولايق عليا، حيث درست في الكلية 13 سنة، وخلفت وأنا في الكلية وكنت بروح لجنة الامتحان وأنا بطني قدامي، وانصح كل بنت ناوية تتجوز تخلص الكلية الأول وواجهت عرقلة كتيرة في الحياة منها الفلوس وقلة اهتمام المخرجين بيا، لكن دوري في فيلم سهر الليالي خطوة مهمة خلتني عديت المرحلة».

واختتمت انتصار: «رميت مشاكلي مع الآخرين ورا ضهري، وعلشان أبقى نفسي لازم أتخلى عن حاجات كتيرة، مش هجامل كل الناس، ومن زمان منتجت ناس في حياتي، وأنا دمي خفيف وبحب الحياة».

انتصار