بسبب إهمال طبي.. صيدلانية تستغيث بتسبب بيطرية في وفاة كلبتها: هصعد الأمر للنقابة
السبت 25/يناير/2025 – 09:37 م
للأسف مستحملتش.. هذه الكلمة التي تلقتها لاري ناجي عندما أبلغتها طبيبة بيطرية خبر وفاة كلبتها خلال عملية جراحية بعد دقائق من دخولها، ومن جانبها استغاثت صاحبة الكلبة؛ بسبب إهمال الطبيبة لعدم قدرتها على تحديد جميع جوانب الحالة وعدم إخبار صاحبة الأليف بكل التفاصيل.
صيدلانية تستغيث بسبب الإهمال الطبي للحيوانات
لولو كانت داخلة كويسة.. هكذا أعربت بها الصيدلانية لاري ناجي في حديثها لـ القاهرة 24، عن حالة كلبتها قبل أن تدخل غرفة العمليات بإحدى عيادات الطب البيطري، ولكن بعد 45 دقيقة ودخول وخروج متكرر للمساعد اللي معاها، خرجت الطبيبة قائلة: للأسف مستحملتش.
وأوضحت صاحبة الكلبة: كانت تعبانة وعندها صديد في الرحم من فترة، وروحت للدكتورة دي في الزقازيق عشان أعالجها، وخلال إحدى الجلسات طلبت مني أعملها عملية، وأنا رفضت وقلت لها طب نحاول بـ المضاد الحيوي، قالت تمام وبالفعل التزمت مع الكلبة بالأدوية.
صاحبة الكلبة: قبل العملية الوضع الصحي اتحسن وقالت لي لازم العملية
وأضافت لاري: قبل العملية عملت تحليل دم ولقيت الصفائح قليلة، وفي السونار قالت لي أنها أتحسنت التجمعات الدموية صرفت والصديد بقى قليل لكن لازم نعمل العملية ومتقلقيش نسبة الخطر 1%، وأنا كنت عايزة أشوف الكلبة كويسة ووافقت، رفضت تديني نسخة من الإشاعة اللي على الرحم وقالت لي: معنديش طباعة، وبعد وفاة الكلبة اكتشفت أنها توفت بـ أورام كتير على الرحم، والدكتورة مقالتش كده في الأول.
وأردفت: وبالنسبة للتخدير، أطباء قالولي إنها كانت المفروض تاخد مُخدر بالاستنشاق فقط لأنها كانت ضعيفة، لكن الدكتورة أدت للكلبة حقن تخدير بالوريد فقط، من غير ما تشوف القلب يستحمل أو لأ، أو تأخذ في اعتبارها تفاصيل حالة الكلبة وإنها ضعيفة بقالها فترة بتاخد مضاد حيوي، ولما سألتها على جهاز التخدير التنفسي قالت لي: معنديش ده في القاهرة، كان المفروض تقول ده قبل العملية، ومهتمش حتى بخياطة الجرح بعد الوفاة والكلبة كانت بتنزف.
شكوى لنقابة الأطباء البيطريين
واستكملت: هي مكنش عندها الأمانة الكافية معايا ولا مع حالة الكلبة، والمفروض كانت تعمل الإجراءات الكاملة وتقولي أن الكلبة مش هتستحمل التخدير، لكن ماينفعش أي دكتور يجازف بـ الحالة ولو ماتت نقول معلش حظه كده، تكلفة العملية كانت 2200 جنيه، وكل جلسة قبلها كانت بـ 650 وروحت لها حوالي 3 جلسات، والدكتورة كان هدفها إجراء العملية فقط.
واختتمت صاحبة الكلبة: هصعد الأمر لنقابة الأطباء البيطريين، وهقدم ضدها شكوى؛ لأن في ناس كتير كلمتني وقالولي أن حيواناتهم ماتوا معاها بـ نفس الطريقة، هي طبيبة معندهاش أمانة ومُهملة في الحيوانات.
