تامر حسني عن تعاونه مع رامي صبري: صديقي من الطفولة وانتظروا كليب «فعلاً مبيتنسيش»
يتعاون الفنان تامر حسني، مع الفنان رامي صبري، في دويتو غنائي جديد بعنوان «فعلاً مبيتنسيش»، ومن المقرر طرحها قريبًا على طريقة الفيديو كليب، عبر موقع الفيديوهات الشهير يوتيوب، بالإضافة إلى عدد من المنصات الموسيقية الرقمية في مصر والعالم العربي، مع بداية العام الجديد 2025.
وكشف الفنان تامر حسني، عن جانب إنساني وشخصي في مسيرته الفنية خلال رسالة مليئة بالمشاعر، حيث وجه كلمات شكر وتقدير لصديقه الفنان رامي صبري، ردًا على إشادته بـ نجم الجيل.
وأعاد تامر حسني نشر كلام الفنان رامي صبري عبر صفحته الرسمية على فيس بوك، وكتب قائلاً: «حبيبي يا رامي أنت قبل ما تكون نجم كبير و مُهم أنت صاحبي من أيام الطفولة و دي حاجات الناس متعرفهاش ويمكن مكنش في فُرصة نحكي ده قبل كده».
وأضاف تامر حسني، قائلاً: «أنت يا رامي صاحب عُمر ومشوار مشيناه من الطفولة و أنا في الصورة ماسك المايك لأخويا و لصوت مصري عظيم يستحق، شُكراً يا حبيبي على كلامك الغالي اللي من القلب أنا فعلاً إشتغلت معاك من كل قلبي و بكُل حرص علينا إحنا الاتنين بكُل التفاصيل بدافع الحُب والصداقة وإن ربنا يكرمنا مع بعض».
وتابع تامر حسني، قائلاُ: «أعتقد إن التعاون ده هيحمس كُل جيلنا إنه يعمل أفكار مشاركة كده وأنا بنادي بيها من زمان من أيام (تامر و شيرين) و بعدها (تامر و بهاء) في أغنية قوم اقف، وأنا وإنت بعدها إتكلمنا من سنين عشان نجمع البعض من جيلنا وعملنا المستحيل، وللأسف معرفناش فقولنا نبدأ بنفسنا عشان نحمس الكُل».
وأختتم تامر حسني حديثه قائلاً: «حقيقي جمهورنا يستاهل مننا كُل الجديد وكل المُفاجآت اللي تفرحه والمطربين اللي هييجوا بعدنا يستحقوا إنهم يتعلموا ده مننا عشان يكملوه للي بعدهم، إنتظروا كليب (فعلاً مبيتنسيش) بيني وبين أخويا النجم الكبير رامي صبري باشا».
وأكد تامر حسني، على أن هذا التعاون ليس فقط هدية لجمهورهما، بل هو رسالة لأجيال المطربين الجدد، تدعوهم لتقدير أهمية التعاون والمشاركة في تطوير المشهد الفني.
كلام رامي صبري لـ تامر حسني
ونشر الفنان رامي صبري عبر صفحته الرسمية على فيس بوك، صورة تجمعه بالفنان تامر حسني، وهو يسمك له المايك ليغنّي أثناء عزفه على البيانو، وكتب قائلاً: «أنا بشوف الصورة دي بشكل تاني خالص، أولاً تامر فنان أخ وغالي ومحترم (وواثق في نفسه) ودي للأسف مش موجودة كتير في مغنيين كتير ناجحين ولكن عندهم مشاكل كبيرة ومايعرفوش يبقوا زي الراجل المحترم اللي ماسك المايك ده».
وأضاف رامي صبري قائلاً: «تامر حسني فنان كبير جداً جداً ولما اشتغلت أنا وهو في الديو اللي هاينزل الفترة اللي جاية فهمت هو ليه محبوب جداً .. أولاً علشان عنده صفاء نفسي مش موجود عندي أنا شخصياً، اه والله أنا دايماً ليا رد فعل انما هو بيسيب الحاجات زي ماهي وما بيحبش يرد ودي حاجة صعبة جداً جداً .. عاوز أقول مش كل فنان أو نجم يستحق .. لأن دايمًا الأخلاق واحترام زمايلك هو الموضوع مش بس الفن».
ووجه رامي صبري الشكر لـ تامر حسني قائلاً: «شكراً تامر حسني على ذوقك واحترامك ليا دايمًا في التصوير ودايمًا كنت تقولي انت مبسوط ايه رايك محتاج حاجه ؟ كل ده ماينفعش يطلع غير من فنان حقيقي عنده احساس بالناس والأهم واثق من نفسه.. قريباً جداً هتشوفوا وهاتسمعوا أغنية ( فعلاً مبيتنسيش) على جميع منصات الموسيقى في العالم».
