تامر حسني يرد على حسام حبيب: لو استفزناك ارجع زي الأول

وجه الفنان حسام حبيب رسالة للفنان تامر حسني والفنان رامي صبري، بعد نجاح أغنيتهما «فعلا مبيتنسيش».

كتب حسام حبيب في منشور عبر خاصية الستوري التابعة لحسابه الرسمي بموقع انستجرام: «أنا بكتب كلمتين من قلبي مش عارف هي مباركة ولا شكر ولا درس وبداية جديدة لجيل أنا فخور إني أكون منه».

رسالة حسام حبيب لـ تامر حسني

وتابع: «إخواتي وأصحابي تامر أنت من زمان وأحلامك وأفكارك كانت دايمًا تخص جيلك ودايمًا كنت بتتكلم معانا من وإحنا صغيرين باسم جيلنا مش باسم تامر بس أنت حلمت لجيلك».

واستكمل حسام حبيب رسالته لـ تامر حسني: «وعشان كده أنا فعلا فهمت يعني إيه نجم الجيل، كنت زمان فاهم إن المقصود بيها أنك الأنجح وده حقيقي، لكن النهاردة فهمت معناها الحقيقي أنت النجم اللي حلم لجيله مش لنفسه ودلوقتي حلمك بيتحقق يا صاحبي».

حسام حبيب

رسالة حسام حبيب لـ رامي صبري

كما وجه حديثه لـ رامي صبري، قائلًا: «والنجم التاني أخويا صاحب أجمد صوت وإحساس، كان دايمًا بيقولي أنا بحلم وعندي هدف وهو كمان كان دايمًا مهتم إن إحنا كجيل لازم نشارك بعض ونقدم للناس حقيقة روح وفن الجيل ده».

وقال حسام حبيب أيضًا: «وكان بكل تواضع بيقول ده لكل فنانين جيله لحد ما التقوا النجمين اللي هدفهم صادق وطلعولنا إبداع مش بس في المزيكا لا والله في الروح والفكر.. أنتم فرحتوني وأمتعتوني وخليتوني أفتخر إني من الجيل ده».

واختتم: «الجيل ده إن شاء الله عمر فنه وإبداعه ما هيخلص.. شكرًا إنكم فتحتم نفسي ورجعتوني أحب المزيكا يمكن أكتر من الأول يا جيل جامد وجامد قوي كمان.. أنتم اللي فعلا متتنسوش».

رامي صبري وتامر حسني

رد تامر حسني على حسام حبيب

ومن جانبه، رد تامر حسني على رسالة حسام حبيب، عبر حسابه بموقع انستجرام، قائلًا: «حبيبي يا حسام.. إيه الكلام الجميل ده طول عمرك محترم وإنسان نضيف وفنان كبير.. لو استفزناك بجد يلا ارجع زي الأول وأكتر.. ارجع متعنا بأغانيك الراقية الجميلة والمزيكا الأجمل.. لأن ليك جمهور كبير بيستنى شغلك وأكيد ليهم حق عليك.. يلا يا حس صفحة جديدة مع مشوارك من النهاردة.. يلا أوعدني قدام الناس إنك ترجع تاني».