جنا الأشقر بعد «وتر حساس»: بدأت اتدرب على مخارج الحروف بسبب تعليقات الجمهور
تحدثت الفنانة الشابة جنا الأشقر صاحبة شخصية ليلى في مسلسل وتر حساس، عن كواليس مشاركتها بالعمل.
قالت جنا الأشقر عبر تصريحات تلفزيونية: «كانت عجباني القصة أوي والإخراج وكان نفسي أشتغل مع المخرج أستاذ وائل فرج والأبطال الكبار اللي ممكن أتعلم منهم».
جنا الأشقر صاحبة شخصية ليلى في مسلسل وتر حساس
وتابعت: «في الأول فكرت إني هاخد دور حلو وشخصية فيها مخاطرة وهقف قدام ناس كبيرة، لكن في نفس الوقت مكنتش عارفة الناس هتتقبل ليلى إزاي لأن كل حاجة بالنسبة لي كانت جديدة، وأستاذ وائل وكل النجوم الكبيرة ساعدوني فكل حاجة كانت الحمد لله تمام، وأكتر تعليق جالي على ليلى إنها رقيقة وهادية وتفكيرها وطريقتها مش مصرية أوي لكن مع كده الناس تقبلوها الحمد لله بفكرها اللي مش مصري لأني توقعت يكون فيه هجوم عليها لكن هي مش بتعمل الغلط عشان عاوزة تعمل الغلط لكن هي مش عارفة إنه غلط وهي على نياتها وعايشة في قوقعتها وروتينية».
واستكملت جنا الأشقر حديثها عن ردود الأفعال، قائلة: «أنا أول مرة أتحط في كم التعرض للتعليقات ده وأنا مش بقعد دايمًا على السوشيال ميديا لكن فيه آراء وحشة بتطلع وأكيد بتضايق منها لكن بحاول أتعلم منها، والسوشيال ميديا ده عالم أنت متقدرش تتحكم فيه، وكذا حد قال ممكن تشتغلي أكتر على النطق ومخارج الحروف، وقلت ليه أتضايق أو الناس تكون عاوزة تضايقني، وفعلا ابتديت أشتغل مع مدرب على مخارج الحروف».
تصريحات جنا الأشقر
وأشارت إلى أنها تبحث في أدوارها المقبلة على شخصيات مختلفة، معلقة: «عاوزة دور زي حد بيتكلم بطريقة مختلفة أو حاجة شعبية وعلى قد ما نفسي أعمله على قد ما لازم أجهز له وأنا بحب أجرب حاجات مختلفة لكن مش بلعب ولازم أجهز كويس أوي.. ولو هعمل فيلم عن حياتي هيبقى اسمه على الله حكايتي».
كما أعربت عن أمنيتها بالعمل مع الفنانة منى زكي، مضيفة: «أنا في مرحلة مش مقتنعة إن عندي صح أو غلط شوية كشغل وعمري ما هعرف الكويس أو الوحش ليّ غير لو جربت، وأهلي أدوني ثقة في نفسي وأبويا حسسني قد إيه أنا مهمة وإنهم واثقين فيا، لأن التمثيل صعب ومخاطرة فأنا داخلاه بثقة بسبب دعم أهلي، وثقتهم فيا خلتني أثق في نفسي وأعمل ده».
واختتمت جنا الأشقر حديثها عن بداياتها، قائلة: «في آخر سنة جامعة التحقت بكورس مسرح وورشة تمثيل وكانت لذيذة ولقيت نفسي في الموضوع ومكملة دراسة من خلال ورش فنية، وبعد كده جالي تجارب أداء من خلال ورش التمثيل وكان أول واحد لمسلسل كامل العدد وعملت تجربة الأداء ولقيت نفسي اتقبلت وعملت الشخصية».
