حمادة هلال يكشف أسراره: اشتريت كفن لوالدتي قبل وفاتها وطول عمري محسود
كشف الفنان حمادة هلال أسرار من حياته، موضحًا أن والدته تعبت بشكل كبير في حياتها وكانت صبورة في المشوار مع والده.
قال حمادة هلال عبر تصريحات تلفزيونية: «أمي تعبت معايا جدًا وبتعلم منها ومراتي كانت بتحبها جدًا، وفي البداية أمي كانت أكتر واحدة صبورة وكانت واقفة مع أبويا وإحنا 4 أخوات وتعب علينا جدًا وكانت سند لأبويا وممكن ميبقاش معاها أي حاجة ولكن تعرف تدبر أمورها وربنا كرمنا بيها».
تصريحات حمادة هلال عن والدته
واستكمل: «ولما جالها مرض السرطان أخذنا قرار إننا منعرفهاش ولما بدأنا رحلة الكيماوي كانت صعبة جدًا وكنت بقول للطبيب بلاش تجيب لها سيرة أنها مريضة سرطان، وأمي كانت بتصدق هي طيبة جدًا لكن كانت ذكية وفضلت عاملة نفسها مش عارفة أنها مريضة سرطان وهي حبت الفيلم ومشيت معانا وخفت شوية وبعدين حصل انتكاسة وصبرت على المرض وكانت دائمًا تعلمنا إزاي نحافظ على النعمة».
وأضاف حمادة هلال قائلًا: «قبل ما أمي تموت بأسبوع اشتريت لها كفن وقلت لأسرتي أمي الأسبوع ده هتمشي وكانت بتفوق وتروح في غيبوبة، وخالتي قالت لي مامتك مكنتش عايزة تدفن في البلد عايزة تدفن في القاهرة فمكنتش جايب مقابر في القاهرة وقابلت راجل محترم هو مقاول واشتريت قبر قبل ما تتوفى وكنا هنروح البلد لكن اشتريت القبر في القاهرة عشان وصيتها».
أول دعوة لـ حمادة هلال أمام الكعبة
وفيما يخص أول دعوة له في أول مرة أمام الكعبة، قال: «في حد قالي قول اللهم اجعلني مستجاب الدعاء وفعلا قلت كده أول ما شوفت الكعبة.. وفيه حاجات بتتحقق من دعائي وحاجات لا تتحقق ولازم تعرف هي مش نصيبك وأنا مش بزعل على حاجة فاتت مني أو مجتليش».
وعن موقفه مع الحسد، علق حمادة هلال قائلًا: «طول عمري محسود وسيبك من الكلام عن السحر اللي ألعن من السحر هو الحسد وهي طاقة شريرة».
واختتم: «اللي عيشته وأنا صغير وما تعرضت له من كسر النفس وأنا صغير وعرفت أنك لو عايز تنجح إياك تصعب عليك نفسك ولو صعبتك عليك نفسك ثقتك ضاعت في كل حتة ولو شخص مش شايفك إياك تفكره بيك ولا تحسسه إنك موجود».
حمادة هلال
