شهيرة تتعرض لوعكة صحية.. السبب «فص ثوم»
كشفت الفنانة شهيرة تعرضها لوعكة صحية خلال الساعات الماضية، بسبب ثوم علق في بلعومها.
كتبت شهيرة في منشور عبر حسابها الرسمي بموقع فيس بوك: «بين طرفة عين وأنتباهتها يغير الله من حال إلي حال.. أنا من أيام قالتلي اللي بتساعدني في البيت يا مدام ماتخدي كل يوم واحدة توم على الريق تقوي المناعة».
شهيرة تتعرض لوعكة صحية
وتابعت: «وأنا سمعت الكلام وبقالي يومين بعمل كدة.. النهاردة التومة كانت كبيرة فقسمتها نصين وبلعت نص وهنا الموضوع فجأة لقيت نص التومة دي وقفت ما بين الحلق والبلعوم».
واستكملت شهيرة: «وشربت زجاجة ماية عشان تنزل مفيش فايدة فضلت رايحة جاية مش عارفة أنزلها إزاي وشربت حاجة سخنه مرة واتنين وأحاول أبلعها وهي رافضة».
تصريحات شهيرة
وأضافت: «انزعجت وخاصهً إني لوحدي وبقيت مش عارفة أعمل إيه لأن مكانها حاسة فيه بألم وشبه خنقة بس مش خنقة.. لمدة أكتر من نص ساعة وتأملت الموقف وقلت سبحانك ربي أنت أعيطتنا نعم كثيرة ولا ندركها إلا في الوقت الصعب المهم إني فجأة أحسست إني عايزة أرجع اللي في بطني مع إنها معلقة فوق ومنزلتش في المعدة».
واختتمت شهيرة: «وفعلا محاولات تقيأ ولكن مبيحصلش أثناء هذه المحاولات تحركت من مكانها ونزلت في معدتي قلت ياااه الحمدلله شكرًا يارب بقى نصف تومة تلخبط كيان الإنسان كدة وإحنا رايحين جايين بنبلع عادي كإنها أجهزة المفروض إنها تشتغل عادي لأ دي بتشتغل مش عادي دي بإذن ورحمة ربنا بينا.. يارب إحنا لازم نشكرك على نعمك التي لا تعد ولا تحصى (طبعًا مكانها لسة فيه ألم من كثرة محاولات البلع الفاشلة) ولكن شكرًا لك يارب على نعمة البلع التي من نعمك العظيمة التي تعطيها لنا من غير حول ولا قوة منا والحمدلله».
شهيرة
