فخور بـ فيلم البحث عن منفذ لخروج السيد رامبو.. وطبيعي أقلق من المنافسة
الثلاثاء 31/ديسمبر/2024 – 11:03 ص
أعرب المنتج محمد حفظي، عن سعادته بـ عرض فيلم البحث عن منفذ لخروج السيد رامبو بطولة عصام عمر، في دور العرض المصرية، وذلك بعدما عُرض في عدد من المهرجانات العالمية.
وقال محمد حفظي، في لقائه مع القاهرة 24: أنا سعيد جدًا إن الفيلم أخيرًا بيوصل للجمهور الأساسي بتاعه الجمهور المصري، سعيد بـ ردود الفعل في المهرجانات اللي عرضنا فيها الفيلم قبل كده، ولكن يهمني جدًا رأي الشارع ورأي الجمهور اللي هيدفع تذكرة، وأتمنى الجمهور ده نقدر نوصله لأنه إحنا في موسم زحمة جدًا ونازل عدد من الأفلام، وفي نفس الوقت فخور باللي صناع الفيلم عملوه وأنا أُعتبر عنصر مُكمل للمشروع، لكن هما شغالين عليه بقالهم سنين، الفيلم ده جالي مشروع كامل مش مجرد ورق.
وعن المنافسة في شباك التذاكر، فعلق محمد حفظي قائلًا: في قلق طبعًا من الإيرادات لأننا في موسم فيه منافسة وفي 3 أفلام نازلين، وكل الأفلام مضيقة على بعض بسبب ظروف تكدس العرض اللي حاصل في الموسم ده بسبب أن شهر رمضان السنة دي جاي بدري شوية، بالتالي كلنا مضطرين ننزل أفلام بدري علشان ناخد فرصة في العرض.
فيلم البحث عن منفذ لخروج السيد رامبو
فيلم البحث عن منفذ لخروج السيد رامبو هو فيلم روائي طويل الأول للمخرج خالد منصور، بعد إخراجه عددًا من الأفلام القصيرة التي شاركت بعدد من المهرجانات الإقليمية والمحلية، ويشارك البطولة الممثل الصاعد عصام عمر في أولى تجاربه السينمائية، الفنانة الأردنية ركين سعد، الفنانة سماء إبراهيم، وغيرهم من النجوم.
