كهربا كان بيقولي إنت أبويا.. وربنا مش هيكرمه عشان كوبري الأهلي
الخميس 29/مايو/2025 – 11:53 ص
كشف مجدي عبد الغني نجم الأهلي ومنتخب مصر السابق، كواليس أزمته مع محمود عبد المنعم كهربا لاعب الاتحاد الليبي.
مجدي عبد الغني يتحدث عن أزمته مع كهربا
وقال مجدى عبد الغني في تصريحات إعلامية: مليش علاقة بأزمة كهربا مع الزمالك وهو غير صادق في هذا الأمر، ويقول زي ماهو عايز يقول في أدلة بتثبت إني صادق وعشان كدا ربنا مش هيكرمه إن شاء الله.
وتابع: كان بيقولي إنت أبويا ورفع سماعة التليفون وقالي عايز أروح الأهلي قولتله بلاش تعادي مجلس الزمالك، وكان وقتها مرتضى منصور رئيس النادي، لقيته ماضي وأخد فلوس، قولتله كمل عقدك وبعدين شوف هتعمل إيه.
وأكمل مجدى عبد الغني: أنا مش خبير خطوط، لكن الاتحاد الدولي فيفا أكد على كلامي ووقع عقوبة عليه ودفع الفلوس، إذن كلامي صح وكهربا وقع على بياض وطلع قال مرتضى منصور أبويا وبعدين في آخر سنة عمل كوبري في البرتغال علشان ينتقل إلى الأهلي.
واختتم مجدي عبد الغني تصريحاته: لاعب الكرة لازم يكون متعلم ومثقف علشان يقدر يكمل، لإن التعليم بيفرق وبيودي اللاعب في حتة تانية، لكن اللاعب الجاهل حتي لو حريف كرة مش هيكمل في الملاعب.
وتعود الأزمة بين كهربا ومجدي عبد الغني عقب رحيل اللاعب عن الزمالك في 2019، بعد فسخ تعاقده من طرف واحد بداعي عدم توثيق عقد تجديده مع القلعة البيضاء في اتحاد الكرة.
وتقدم الزمالك بشكوى ضد كهربا في الاتحاد الدولي بالهروب من الفريق، في الوقت الذي أكد فيه مجدي عبد الغني مسئول شئون اللاعبين باتحاد الكرة حينها، أن عقد كهربا بالفعل قد وثق قبل الموعد النهائي للقيد.
وقرر الاتحاد الدولي لكرة القدم بعدها، تغريم كهربا 2 مليون دولار بالإضافة لـ 5٪ فوائد لصالح نادي الزمالك، وثبوت صحة العقد الموقع.
