لقاء الخميسي : أنا مسلمة بالوراثة ونزلت القبر مع أحمد زكي

كشفت الفنانة لقاء الخميسي العديد من أسرارها الشخصية والفنية، وعلاقتها بعدد من نجوم الوسط الفني، قائلة: «نزلت القبر مع أحمد زكي، كان يوم صعب جدًا».

وتابعت لقاء الخميسي في تصريحات تلفزيونية لها: «عمري ما فكرت في الانتحار، وابني بيخليني أعيط كل يوم، وشايفة إن أي حد يضايقني يخبط راسه في الحيط وكل يوم بكلم نفسي، وبقول أنا لقاء الخميسي وبحبني، وبكلم ربنا».

أسرار لقاء الخميسي

واستكملت: «ودا حصل لأني بقيت أحب نفسي مؤخرًا، لأني مكنتش بحب نفسي زمان»، وفيما يخص قلة أعمالها الفنية خلال الفترة الأخيرة، علقت قائلة: «أخترت أريح وعمري ما قلت هي ليه واحدة زيي مبتمثلش؟!».

وأضافت لقاء الخميسي: «عمري ما ندمت على أي تصريح قلته، أنا طول الوقت بتهاجم.. وابني هو نقطة ضعفي، إحنا الاتنين نفس الحب، وهخلص منها قريب، هو قعد معايا فترة طويلة لوحدنا، كل حياتي صاحبي وأخويا عنده دلوقتي 18 سنة».

لقاء الخميسي

ديانة لقاء الخميسي

وتحدثت أيضًا عن ديانتها، موضحة أنها تعتنق الديانة الإسلامية عن طريق الوراثة، لكنها لم تُسأل عن أي ديانة تُفضل الانتماء لها، بسبب أنها ولدت وجدت والدها مسلمًا فورثت منه ديانته، مثلما ورثت جنسيته.

وقالت أيضًا: «إحنا بنورث ديننا، حد مبيورثش الدين من الأب، أنا مصرية بالوراثة ومسلمة بالوراثة، وأخدت دين أبويا، ولم أسئل أنا عايزة أبقى إيه، هل ده له علاقة من أني مصرية، هل دا تقليل من ديني؟!، أنا واضحة بشكل كافي ومش مجبرة أقول حاجة ليها معنى تاني، إحنا واخدين ديننا بالوراثة.. كان ممكن أصحى من نومي ألاقي أبويا مسيحي وأبقا مسيحية، أنا مخترتش الناس بتعاقبني ليه؟».

وتابعت لقاء الخميسي: «لو ليا جار مسيحي أنا مبحبوش بعقابه ليه؟، هو ماله هو صحي لقى أبوه مسيحي المفروض ينتحر أو أموته مثلا؟!، المسلميين والمسيحيين بالوراثة، أنا أنتيم عمري مسيحي، هل معناها أني أنا مسلم والمسيحين وحشين».

تصريحات لقاء الخميسي

وقالت عن النقاب: «غير مذكور في القرآن، وعمري ما قلت إنه مُبتدع، ربنا قال وليضربن بخمرهن على جيوبهن، هي حتة قماشة على الصدر».

وأضافت: «الحضارة الأشورية هي الأقدم، ولم أقل إنها أهم من حضارتنا المصرية، عمري ما قلت إن الأشورية هي الأهم، ولا يعني ذلك أني أخطأت في حضارتي المصرية اللي أنا فخورة بها، مفيش حاجة تقلل من حضارة المصريين، أنا باسبوري مصرية وقخورة بيه».

لقاء الخميسي

خيانة لقاء الخميسي

وكشفت الفنانة لقاء الخميسي تفاصيل تعرضها للخيانة، أثناء فترة ارتباطها من شخص بمرحلة دراستها في المعهد، لافتة إلى أنها كانت تعلم بعلاقاته النسائية الكثيرة، ولم تعترض عليها، لكن بعد علمها بخيانته تركته بشكل نهائي.

وعلقت قائلة: «دخلت علاقات فاشلة، واتعلمت منها إن مش كل اللي أنت عايزة هتاخده، هتاخد الراجل اللي تتكيف معاه، أنت هتحبه بعبله بالحاجات الكويسة وغيرها، مش هتقدر تلاقي شخص راسمه في خيالك.. عبد المنصف مش شبهي خالص، مفيش حاجة شبه بعض فيها غير إننا إحنا الاتنين طيبين، حبيت وأنا في المعهد مكنش حب جواز أو ارتباط».

واستكملت: «اتخانت مرة واحدة في حياتي، هو كان شخص بيخون على طول، وكنت عارفة إنه عارف بنات كتير هو كان مُز، لما خاني مشيت ومقولتلوش السبب، مبمشيش وأنا مريحاك ومبردش على تلفونات نهائي، بتعامل بالبلوك.. وعلى مدار حياتي متخانتش من أصدقاء كتير، لأني باخد بالي بصاحب مين، في ناس ضربت من تحت الحزام، بس مش مهمين في حياتي، وفي ناس مهمة خانتني».

وقالت لقاء الخميسي أيضًا: «زعلت وقعدت في البيت وعانيت، لكن تعاملت معاهم بالبلوك ومردتش على إهانتهم، لأني عارفة أني من جوايا كبيرة وميصحش أرد سكت 7 سنين على الإهانة، متأذنيش في مشاعري، في ناس لفت من ورايا عشان تاخد أدواري في بعض الأعمال الفنية، بس دلوقتي بقيت بسامح، بتعامل أنه مش من نصيبي، إحنا جايين الدنيا علشان نتعلم، طول ما بغلط بتعلم».

زوج لقاء الخميسي

كما تحدثت أيضًا عن بداية علاقتها بزوجها اللاعب محمد عبد المنصف، موضحة أنهما تقابلا صدفة ثم تكررت مقابلتهما، وبدأت شرارة الحب بينهما، بعد أن وجد كلا منهما في الآخر الشيء الذي ينقصه، حيث أن الأخير فاجأها في أحد الأيام وطلب يدها للزواج في يوم واحد.

وقالت لقاء الخميسي عن زوجها: «أول ما بصيت لعينه حسيته طيب ونحنوح، هو اللي قالي في الأول بحبك، واتقابلنا صدفة في كافيه، بعدها خرجنا ولعبنا تنس، لقيته بريء براءة غير طبيعية، كنت بقول هو الراجل ده ممسكش إيدي ليه؟، وليه طول الوقت بيبص لي في عيني بس».

وتابعت: «اليوم اللي مسك إيدي هو اليوم اللي باسني على خدي وقالي فيه تتجوزيني، كان بقاله 6 شهور ممسكش إيدي.. مش عارفة ليه.. وأي هجوم له علاقة بمحمد عبد المنصف بيجنني، أول ما حد بيجي على طرف عبد المنصف بقوم في الناس قومه رجل واحد».

وأضافت: «هتشتم هشتم مبسكوتش، مش هشتم بطريقته عشان مستوايا ميتدناش، لكن هعرف أردلك الإهانة، أنا وأوسا شخص واحد، وعمري ما سيبت بيتي، لأن العيال بتتوجع وملهمش دعوة بالمشاكل بينا.. وهو طيب زيادة عن اللزوم، هو وأهله طيبين، عنده رضا وسماحة وهادي، بغير عليه جدًا وعلى الله أشوف وش واحدة جمبه، وهو مكنش بيغير عليّ الأول، لكن دلوقتي بيغير عليّ زيادة على اللزوم».

واختتمت لقاء الخميسي حديثها، موضحة أنها كانت تتمنى تقديم السيرة الذاتية للسندريلا سعاد حسني، معلقة: «سعاد حسني كانت فنانتي المفضلة، كان نفسي أعمل سيرتها الذاتية، لأنها كانت صاحبة أبويا، وجدي اللي اكتشفها لكن مزعلتش لأنه المسلسل كان رزق منى زكي ومثلته حلو».

لقاء الخميسي