محمد رجب: لم أندم على رفض «عبده موتة» وأحمد عز في حاله

كشف الفنان محمد رجب موقفه من التعاون مع الفنان محمد رمضان، موضحًا أنه من النجوم الذين يحبهم ويحب اجتهادهم وعملهم.

قال محمد رجب عبر تصريحات تلفزيونية: «محمد رمضان مكنش بيقبل كل الأدوار اللي أنا كنت برفضها، وهو من النجوم اللي بحبهم وبحب اجتهاده، وفيلم عبده موته لم يكن من ترتيب أهدافي ومش ندمان إني رفضت الدور وكل فنان له وجهة نظر في أدواره».

تصريحات محمد رجب

وأضاف: «مكنتش عايز أعمل النوعية دي من الأفلام وقعد سنين كتير لحد ما بقى عبده موتة من نصيب محمد رمضان ومش معنى إن محمد رمضان نجح في الفيلم النجاح العظيم ده إني كنت هنجح به وهو بتاع محمد رمضان.. وموقفي من العمل معه مترتب على الدور من ناحية حجمه والوضع اللي هبقى في الفيلم عامل إزاي ولازم أشوف الورق الأول.. محمد رمضان ميجا ستار وأنا ستار، المفروض اسمه يتكتب قبل اسمي على العمل، وعشان أقدر أروح المشوار اللي أنا عايزة لازم أعرف أنا قاعد فين الأول، وهدفي أكون ميجا ستار وأنا بعمل اللي عليا وإنها تيجي أو متجيش شيء بتاع ربنا».

وقال محمد رجب أيضًا إنه قدم 12 فيلمًا بدور شرير، مضيفًا: «بطلع شرير غني ومعاه عربية والبطل بيحب واحده وأنا بيضايقه ولما وصلت للمرحلة دي تعبت وكنت بدخل السينما اتشتم كتير، ومش قادر استحمل إني لما أخش مكان عام الناس تنفر وتخاف حتى لو بدعوى النجاح ومليت من كلمة ده نجاح والأفلام والأدوار بقت شبه بعضها».

تصريحات محمد رجب عن أحمد عز

وكشف علاقته بالفنان أحمد عز، موضحًا أنه صديق مقرب له وعاشا معًا كل التجارب حتى الانطلاق في العمل الفني، معلقًا: «كان بيسيب السياحة وأنا أسيب الشغل بتاعي ونشوف حظنا وكنت بروح له البيت كتير بعدما خلصنا مذكرات مراهقة، كنا بنشوف بعض بشكل يومي في أعمال فنية وهو ملتزم وصاحب صاحبه ومش بيحب يجيب سيرة حد وفي حالة، وبقالنا كتير متقابلناش لكن بيننا عشرة سنين كتير أوي».