مصطفى قمر عن أزمة طارق الشناوي: من حقي أدافع عن نفسي
تحدث الفنان مصطفى قمر على تعليق الناقد طارق الشناوي عليه، بأن فيلمه الجديد أولاد حريم كريم من أسوأ الأفلام التي عُرضت.
مصطفى قمر يعلق على تصريح الناقد طارق الشناوي
قال مصطفى قمر في تصريحات تلفزيونية: ‘النقد يعني أقول مظاهر الجمال ومظاهر الضعف والأخطاء، وأتكلم عن الإخراج والتصوير والأداء والحبكة، هو حر أنه يقول أسوأ فيلم لكن أنه يقول مصطفى قمر مطرب فاشل دا اللي ضايقني، احنا نجوم وبنمثل بلدنا بفننا المحترم الراقي، لكن اتبهدل في بلدي ويتقال كلام وحش عني ونتكرم من إخواتنا وحبايبنا في البلاد التانية’.
وأضاف: ‘أنا مقدرش أسيب واحد في المهنة متخصص يطلع يقول مصطفى قمر فاشل، هو قال في الحوار مصطفى قمر علق فشله كمطرب أنه يجيب نجمات انتهوا وإن مصطفى قمر فقد الوهج، المفروض بعد حواره أحفر تربة وأقولكم موتوني’.
واستكمل مصطفى قمر حديثه قائلًا: ‘من حقي أني أدافع عن نفسي بقوة واللي بيدافع عنه يبقى شبهه ومن نفس النوعية، كل الناس اللي غلطت في شخص مصطفى قمر هاخد حقي بالقانون لكن الناس اللي طلعت تتكلم عن الفيلم هرد عليهم بالنقاش’.
طارق الشناوي يهاجم فيلم أولاد حريم كريم
انتقد الناقد الفني طارق الشناوي فيلم أولاد حريم كريم للفنان مصطفى قمر، معلقًا: «أسوأ الأعمال الفنية بالنسبة لي في الموسم الحالي».
قال الناقد طارق الشناوي في تصريحات تلفزيونية له، إن فيلم أولاد حريم كريم، من أسوأ الأفلام والأعمال الفنية، مضيفًا: «علي إدريس مخرج طبعًا مهم.. وزينب عزيز كاتبة مهمة إنما اللي عملوه مش بس مالوش علاقة بالجزء الأول».
وتابع: «ده مالوش علاقة بفن السينما اللي إحنا بنعيشه دلوقتي.. ده تراجع لزمن ما قبل الجزء الأول.. والكتابة كمان اللي كتباها زينب عزيز قديمة قوي».
وأضاف الناقد الفني طارق الشناوي: «التفاصيل دي مبقتش تجيب ولا تضحك، فالفيلم افتقد الضحك.. ومصطفى قمر في عز فشله كمطرب قرر يعمل فيلم، ومع الحريم اللي هما مش مطلوبين قوي في السينما».
واستكمل: «الوحيدة اللي كانت لها اسم ووهج ياسمين عبد العزيز، عشان كده هي الوحيدة اللي قالت لا، عشان مش هتقبل تكون موجودة نصف بطلة أو خُمس بطلة.. مشكلة مصطفى قمر إنه عايش على الزمن القديم، مثلا عبد الحليم السينما فكرت فيه لما عمل غنوة على قد الشوق، فاتعمله فيلم مع شادية لأنه كان ناجح كمطرب».
واختتم: «لما بتفشل كمطرب السينما مش هتصعدك، اللي بيفشل كمطرب بيعتقد إن السينما هترجعه للبريق.. ومصطفى افتقد الوهج، وبيمثل الدور من غير حالة من الوهج والشغف بيمثل وخلاص حافظ وبيأدي، مش حابب».
مصطفى قمر يرد على طارق الشناوي
قال مصطفى قمر عبر حسابه بموقع إنستجرام: ‘هو أنا مش طلبت منك تبعد عني أصلًا ومتتكلمش عني علشان متتهزأش طيب انت اللي جيبته لنفسك عموما ياللي اسمك طارق’.
وتابع: ‘انت كاتب كلام اهبل يدل للمرة المليون انك ماشفتش الفيلم وعموما اللي هيرد عليك جمهور السينما الحقيقي اللي دخل الفيلم اللي مالوش دعوة بالنفاق او مصلحة اي فيلم تاني فكرني كدة شغلتك ايه من اريع حروف بيتهيألي’.
