من العتاب للتراجع.. قصة جملة تسببت في سوء تفاهم بين علي الطيب وأبطال «عمر أفندي»

«حاجة 13 خالص»، جملة تداولها الكثير من رواد مواقع التواصل الاجتماعي تزامنًا مع عرض مسلسل عمر أفندي، وأثارت فضول الجمهور حول معناها، ولكنها تسببت في سوء تفاهم بين الفنان علي الطيب وأبطال العمل.

وزعم البعض من رواد «السوشيال ميديا» أن أول من قال جملة «حاجة 13 خالص» بالدراما، كان الفنان علي الطيب في مسلسل أهو ده اللي صار عام 2019.

علي الطيب وجملة حاجة 13 خالص

وخرج علي الطيب عن صمته وأعرب عن انزعاجه، حيث كتب عبر حسابه الرسمي بموقع فيس بوك: «حابب أبارك لكل زمايلي في عمر أفندي على نجاحهم، بجملة وديع البساطي المشهورة دي حاجة 13 خالص».

وتابع: «واستنوا على الجزء التاني لغاية ما أفكرلكم في الجديد منه عشان تعرفوا تقلدوه، تحياتي للي نجحوا بمصطلحاتي، وطول عمرها اللعبة لها أصول وبنتعلم من بعض، مش بنعلم على بعض».

علي الطيب

علي الطيب يتراجع بسبب أبطال مسلسل عمر أفندي

وبعد ساعات قليلة، تراجع علي الطيب وحذف المنشور الذي كتب فيه أن صناع العمل نجحوا بمصطلحاته، وكشف سبب حذفه لكلامه السابق.

وكتب في منشور جديد عبر حسابه بموقع فيس بوك: «تم حذف البوست والأسباب هي أنا ممكن أكون عبرت بشكل يزعل زمايلي من اللي اتكتب بس هما زعلوني بأنهم مذكروش في أي برنامج أو أي لقاء.. وأنهم اقتبسوها من وديع البساطي في مسلسل أهو ده اللي صار.. مصطلح موجود في مصر زمان فعلا مش أنا اللي اخترعتها».

وأضاف: «بس بيبقى كل ممثل بيبذل مجهود من أجل الشخصية تبقى لحم ودم مش كلام على ورق فقط وبيقول كلامه وخلاص وده كان جزء من مجهودي اللي تم أثناء تحضير الشخصية في المسلسل وبعد ما عرضت بعض المصطلحات على الأستاذ السيناريست عبدالرحيم كمال والأستاذ حاتم علي عليه رحمة الله.. اختارنا اللي يتناسب مع الشخصية التي تعبر عن شخصيته واتوظف في الحوار بشكل مناسب ومنطقي للمشاهد من الأستاذ عبد الرحيم واتعرض المسلسل وربنا كتب لنا القبول في قلوبكم ونجح المسلسل واتشهرت شخصية وديع البساطي بمصطلحاتها اللي تعتبر كانت جديدة على الجمهور رغم أن الجملة ليها أصل ومعنى ووضحناه في المسلسل».

واستكمل علي الطيب: «وأظن إحنا في مهنة واحدة يعني عارفين شغل بعض ونعرف بعض كويس وبينا كل خير لا يمكن يجيلي عمل فني أو اسكريبت واكتشف أن في جملة أو مصطلح مشهور لزميل ليه ونجح بيه وأكرره أو اتجاهل مجهوده هو وصناع العمل واحترم نجاحه وحق كل فنان يغير ويبقى نفسه يعمل شخصية حلوة ويستمتع بأدائها المشاهد وده حق شرعي بس أظن أن التميز هنا هيكون في الاختلاف والاجتهاد المطلوب منك وليس الاستسهال ولنفرض حصل وقولت مصطلح يخص شخصية فنية لعبها زميل ومتفرجتش عليه أو مافيش حد نبهني.. يبقى أقل واجب بعد عرض المسلسل وعرفت المعلومة يبقى أقل حق سواء كتاب العمل أو أنا كفنان أوضح في أي لقاء في أي برنامج أنه تم الاقتباس من العمل الفني اللي قبلنا

ووقتها مش هيكون ليا حق أزعل وأفهمها تجاهل من زمايلي لأني غصب عني مفهمتهاش غير كده».

وتابع: «واللي يعرفني كويس عارف إني دايمًا مبتأخرش عن زمايلي وبفرح لنجاحهم من قلبي ولا عمري نفسنت ولا اتكلمت في تفاصيل شبه دي بس الموضوع لو مكنش يخصني كنت هقول كلمة حق في حق الزميل اللي سبق ونجح بشخصية وبمصطلحاتها اللي علمت مع الجمهور بفضل ربنا وأهم من كل ده اكتشفت أن البعض هيحولوا الموضوع لمشكلة وهيكبروا الموضوع بيني وبين حاتم وأبو سريع وآية وإحنا اللي بينا كل خير وصحاب وأخواتي وعلى راسي وربنا يعلم أنهم غاليين عندي بس حسيت إني مش شرط يكون زعلي من تجاهلهم يفرق معاهم».

واختتم علي الطيب: «فمحبتش أسيب الموضوع يكبر وياخد اتجاه مش لطيف وطلبت من الشباب المسؤولين عن الصفحة تحذف البوست لأن العتاب والهزار هيقلب جد لحد ما اكتب بوست أوضح فيه وربنا ما يجيب زعل ولا مشاكل وعلى رأي البساطي.. الفنان أناني و مش عيب».

علي الطيب

رسالة علي الطيب لأسرة مسلسل عمر أفندي