مها متبولي: محمد رمضان ملوش بصمة وقلبي اتقبض أما دخلت بيت ذكرى
كشفت الناقدة الفنية مها متبولي رأيها في الفنان محمد رمضان، وأعماله، بجانب فكرة برنامجه في رمضان 2025.
قال مها متبولي عبر تصريحات تلفزيونية، إن فكرة برنامج مدفع رمضان حلوة لأنه يجمع تبرعات، مضيفة: «محمد رمضان شغال سوشيال ميديا كويس، لكن ملوش فيلم بصم فيه لو بصيت على السينما، ولو بصيتي في المسلسلات هتلاقيه منجحش بره مسلسلات محمد سامي يبقى معنى كده إن محمد سامي اللي نجح».
تصريحات الناقدة مها متبولي عن محمد رمضان
وتابعت: «وكان عامل مسلسل مع محمد ياسين ما يعلم به إلا ربنا، هو موهوب جدًا، وفعلا بيستفز زمايله وبيتضايقوا منه، وأنا ضد اللي هو بيعمله هو قال عبدالحليم حافظ دخل الناس لحد غرفة النوم، طب حليم كان بيثبت أنه متألم وتعبان».
وأضافت الناقدة مها متبولي: «دلوقتي كله بيقلده أنغام واحمد سعد بيقلدوه في الطيارات الخاصة، هو مش نمبر وان طبعًا لأن فيه عمرو دياب في الغناء بقاله 40 سنة، محدش هينجح نجاح محمد رمضان».
تصريحات مها متبولي
واستكملت: «لما شوفت برومو مسلسل سيد الناس لقيت عمرو سعد بيقلد محمد رمضان والحركات عشان كده بقوله يا عمرو لازم تدرس الشخصية، وتعملها فمعرفش التشابه ده ليه.. منه ولا المخرج».
كما كشفت الناقدة الفنية تفاصيل آخر لقاء جمعها بالفنانة الراحلة ذكرى، خلال حوار صحفي لها في منزلها، معلقة: «موت ذكرى وأحمد زكي موقف حسيت فيه باكتئاب شديد وصدمة».
لقاء مها متبولي وذكرى
وقالت أيضًا: «كنا صحاب أنا وهي وكانت إنسانة كويسة وطيبة جدًا وكنت بروحلها بيتها في الزمالك ودخلت البيت بتاعها مع أنه حلو وفخم جدًا قلبي اتقبض وقعدنا في البلكونة وكانت لسه منزلة ألبوم يوم ليك ويوم عليك، وعملنا حوار وبعد ما خلصنا الحوار قولتلها ليه اتجوزتي الراجل ده».
واختتمت مها متبولي: «قالت عشان عايزة أخلف.. وبعدها بـ 4 أيام اتوفت، ومدير أعمالها كلمني وقالي إنها اتقتلت ومكنتش مصدقة طبعًا، أما أحمد زكي مفيش زيه، أحمد زكي كنت أعرفه كويس أوي مكنش له علاقه حلوة بالصحافة، وأنا كنت بالنسبة له من الناس المقربين ولو عايز يعمل حوار كان بيكلمني لما عرفت أنه أصيب بالعمى جالي اكتئاب شوية وقبلها جيهان السادات زارته ومن شدة ذكائه موضحش أنه أعمى».
