مي عمر تدافع عن مسلسل إش إش: ولا مشهد خادش والرقص باحترام

علقت الفنانة مي عمر على انتقادات مسلسل إش إش، الذي تنافس به ضمن موسم مسلسلات رمضان 2025، واتهامات نشر أفكار تهدم المجتمع ومخالفة قوانينه.

قالت مي عمر عبر تصريحات تلفزيونية: «أرفض أني أقدم أي حاجة مخالفة لقوانين المجتمع أو بتهدم أفكاره، وأتحدى أي حد يقولي إن المسلسل بيهدم قيم المجتمع».

مي عمر تدافع عن مسلسل إش إش

وتابعت: «يمكن الفكرة دي كانت اتاخدت لما شافوا البرومو وأخدوا جملة وقالوا إيه ده، لكن لما يتفرجوا على المسلسل هيلاقوا أن الجمل بتتقال في سياق آخر، إحنا عندنا قصة اجتماعية مفيش أي حاجة خادشة ولا مشهد خادش، وحتى الرقص معمول باحترام شديد والبدل معمولة باحترام شديد، إحنا بنحترم المجتمع والجمهور وعاملين مسلسل بجد فيه دراما حلوة».

واستكملت مي عمر: «الألفاظ هو في الآخر مجتمع مختلف مجتمع راقصات فأكيد لهم لغة مختلفة غير لو عملتي محامية أو دكتورة، هما لهم اللغة بتاعتهم اللي لازم تستخدميها عشان تحسي باختلاف الشخصية، لو خليتها تتكلم زي نعمة أو أي دور عملته هيبقى إيه الفرق».

تصريحات مي عمر

وأضافت: «لكن المسلسل عدى على الرقابة وواخد تصنيف (+18)، مينفعش حد يتفرج ويقول أصل بنتي عندها 5 سنين فسمعت لفظ، حتى الألفاظ مفيش حاجة جريئة أو خادشة لكن هي مناسبة مع البيئة اللي عايشين فيها».

وقالت مي عمر أيضًا عن تحضيرات مسلسل إش إش: «قبل المسلسل مكنتش بعرف أرقص وفضلت 6 شهور أتعلم عشان لازم للشخصية ورجعت لوزني الطبيعي لأني كنت في نعمة تخنت شوية عشان الدور، بعدين رجعت لوزني لأن الدور لازم تبقى البنت رفيعة لأنها بتشتغل راقصة، وأكتر حاجة عجبتني في الدور أن شروق رقاصة ومامتها وخالتها راقصات، هو العالم بتاعها ده لكن هي رافضاه وعندها طموح آخر، ولما حصلها مشكلة في حياتها فهي متربية في العالم ده ومتأثرة بيه، حتى لبسها هو محافظ بس فيه الروح بتاعتهم مش بتلبس كطالبة جامعية».

واختتمت: «طريقة كلامها، كان ممكن تتغير لو الحياة أدتها الفرصة دي والموقف اللي حصل معاها بسبب أن هو استحلها عشان بتشتغل رقاصة مع أنها كانت رافضة ده ومتستاهلش اللي حصل فإحنا بنناقش أن مش لازم نحكم على حد من برا مش عشان بتشتغل كذا متكونش كويسة».