هلا رشدي بعد حضورها مهرجان حكاوي: أحضر ألبوم للأطفال

أعربت الفنانة هلا رشدي عن سعادتها بتكريمها، على هامش فعاليات مهرجان حكاوي الدولي لفنون الطفل.

وأكدت هلا رشدي عبر بيان صحفي، حبها للأطفال وأمنيتها بتقديم أعمال فنية لهم، وعلقت على عدم حضور ابنها معها، قائلة: «معز له اهتمامات مختلفة عنده ماتش، عنده حاجة يتفرج عليها ويقولي لا مش هعرف أجي معاكي فأنا بردو بتحرك عشان أبقى أخف ومنتخانقش».

هلا رشدي في مهرجان حكاوي

واستكملت: «حاجة ممتعة جدًا إنك تبقى شخص الأطفال بتحبه وتتعلق به والأطفال تقلده وتسمع الكلام اللي هو بيقوله عشان كده باخد بالي أوي من الكلام اللي بيتقال عشان ميتلقطش كلمة يقلدوها يقولوها فبحاول بأقصى ما يمكن إن أنا أركز، والأطفال في حياتي حاجة كبيرة ودلوقتي بقت غلاوتهم أكتر والمسؤولية زادت».

وأعلنت هلا رشدي تحضيرها لألبوم خاص للأطفال، معلقة: «أنا بالفعل شغالة في ألبوم للأطفال عشان هما يستاهلوا بصراحة ويستاهلوا يبقى عندهم أغاني زي ما إحنا كان عندنا أغاني حلوة زمان، وإحساس الألبوم بيفكرنا إحنا بأيام حلوة، وإحساس الألبوم إن الواحد يسمع أغاني ورا بعض وإنك تقلب الشريط».

حقيقة مشاركة هلا رشدي في رمضان 2025

وفيما يخص موقفها من المشاركة ضمن موسم دراما رمضان 2025 المقبل، قالت: «أنا مش موجودة في مسلسل الكابتن بس إن شاء الله احتمال وإن شاء الله خير، ويارب ينجح زي كل مرة، وده أكرم بردو لو قال الإيفيه خلاص الموضوع بيخلص والمسلسل نجح ويكسر الدنيا، ويارب دايمًا أبقى عند حسن ظن الجمهور وإن شاء الله المرة الجاية أبقى بقدم حاجات أكتر وحاجات أحلى وحاجات تشرفهم تخليهم لما يكبروا أحس إن أنا عملت تاريخ حلو».

هلا رشدي