المتهم طعن الضحية بالمطواة أكتر من مرة قاصد يموته
الجمعة 29/ديسمبر/2023 – 07:09 م
يستكمل القاهرة 24 نشر التحقيقات في القضية رقم 15502 لسنة 2023، والمعروفة إعلاميًا بـ جريمة عين شمس، المتهم فيها مصطفى. أ، بإنهاء حياة المجني عليه صابر علاء صابر، وسط الشارع؛ لخلافات سابقة بينهما بسبب دفاع المجني عليه عن والدته.
وينشر لكم القاهرة 24 أقوال هاني. م، أحد شهود العيان على الواقعة أمام جهات التحقيق.
أقوال شاهد العيان في جريمة عين شمس
بسؤال الشاهد عن صلته بالمجني عليه صابر علاء صابر قال: هو ساكن في المنطقة اللي أنا ساكن فيها وبيعدي من قدام الجراج اللي شغال فيه، وبيسلم عليا وهو معدي، ووقت الحادثة أنا كنت واقف في الشارع وشوفت كل حاجة.
وأكمل: اللي حصل إن أنا كنت واقف في الشارع قدام الجراج، ولقيت مصطفى بتاع العيش ماسك في صابر من هدومه ومعاه مطوه وبيضربه بضهر المطواه على دماغه، وبعدين راح ماسكه تحت باطه وفضل يطعنه بالمطوه كذا مرة، والناس حاشته وصابر مشي کام خطوة وراح واقع على الأرض، الكلام ده حصل يوم 31/7/2023 حوالي الساعة 9 صباحًا في شارع آدم بعين شمس.
وأضاف الشاهد أمام جهات التحقيق حول علاقته بالمتهم مصطفى.ا: هو شغال على فرشة عيش على ناصية شارع آدم اللي أنا شغال فيه وبشتري منه عيش، لكن مفيش علاقه بينا وأنا مشوفتهمش لما اتقابلوا أنا شوفتهم وهما بيتخانقوا مع بعض ومصطفى بيضرب صابر.
جريمة عين شمس
وأكمل شاهد العيان أمام جهات التحقيق: مصطفى هو اللي مسك المجني عليه وطلع مطواة وفضل يضربه بضهرها على دماغه، وبعد كده راح ماسكه تحت باطه وفضل يغزه كذا مرة وصابر معافرش معاه، ومعملش أى حاجة لأن مصطفى كان ماسكه وبيضرب فيه ومش مديله فرصة عشان كان معاه مطواه وكان في ناس كتير في الشارع.
س / ما هي طبيعة الأرض التي كان المتهم والمجني عليه يقفون عليها آنذاك؟
ج / الأرض في مكان الواقعة أسفلت.
س / كم طعنة كالها المتهم مصطفى. ا للمتوفى إلى رحمة مولاه؟
ج / هي كذا طعنة بس معرفش عددهم بالضبط.
س / في أي موضع من جسد المجني عليه استقرت تلك الطعنات؟
ج / أنا شوفته بيضربه في جنبه الشمال وفي صدره.
س / وما هي المسافة التي كانت تفصل بين المتهم وبين المجني عليه آنذاك؟
ج كان مصطفى ماسك صابر تحت باطه وبيغزه بالمطواه.
س/ ما هو قصد المتهم من ذلك؟
ج / أكيد قصده يقتله.
س / كيف وقفت على ذلك القصد؟
ج / لأنه غزه بالمطواة كذا مرة في جنبه وصدره وده ضرب يموت.
