أحمد ماهر: عشقي زاد للرسول بعد رؤيته ورفضت أعتذر لعادل إمام

كشف الفنان أحمد ماهر تفاصيل رفضه الاعتذار للزعيم عادل إمام، كما تحدث عن رؤيته للرسول في المنام.

قال أحمد ماهر عبر تصريحات تلفزيونية: «اتطلب مني أعمل مشهد في فيلم شمس الزناتي ووافقت، ولكن تزامن مع يوم التصوير أول يوم بدء تصوير مسلسل ذئاب الجبل وكان عندي الأوردر للمسلسل في ماسبيرو وهخلص على 11 ونصف وألحق أروح شمس الزناتي».

سبب غضب عادل إمام من أحمد ماهر

وتابع: «لكن بعد ما خلصت مشاهدي في المسلسل فوجئت بأبواب الديكور مقفولة وقالوا لازم نصور مشهد تاني هنقفله عشان منصورش في يوم تاني ويكون تكلفة إنتاجية، وطلبت من الإنتاج يتواصل مع إنتاج الفيلم ويبلغ المشكلة وبالفعل كلموهم وخلصت مشهدي في ذئاب الجبل ورحت على شمس الزناتي بعد الساعة 2 صباحًا».

واستكمل أحمد ماهر: «ودخلت قولت عذري للناس وإن الإنتاج مبلغ بالتأخير.. جه حد في أوضتي وهمس لي وقالي الزعيم زعلان عشان معتذرتش.. قولتله أنا اعتذرت للكل والإنتاج بتاع ذئاب الجبل كلمهم، قاله لا كان عايزك تعتذر له لوحده.. فرفضت».

رؤية أحمد ماهر للرسول

وفيما يخص رؤيته للرسول في المنام، علق قائلًا: «عشقي زاد للرسول بعد رؤيتي له في المنام أكثر من مرة.. ووقتها لما حكيت الرؤية لوالدتي قالتلي لو كتمت على الموضوع هتروح تزوره السنة دي.. وبالفعل حصل وربنا حقق لي ده، أنا بحب أزور سيدنا الحسين والسيدة زينب والسيدة نفيسة».

كما كشف أحمد ماهر طرق عقاب والده له في طفولته، وقال: «أبويا كان بيعاقبني بالشومة مش الكرباج وده مش بيتعمد يعمل كدة لكن كانت الشومة أقرب حاجة لإيده طبيعي في حي بولاق.. وأنا دماغي كلها خبطات من الشوم وده اتسبب في إصلاحي وتهذيبي».

واختتم: «أنا شوفت تربية والدي العصامية وحرصه على أنه ينشأ ولاده رجالة لكونه في حي شعبي، وأنا كمان كنت حريص أن ولادي يطلعوا رجالة بالشكل ده.. وتربية الولاد زي تربية المماليك مجرد ما يشوف النظرة يعرف إن الكرباج جاي».

أحمد ماهر